E uiraa ! E aha te faa ?
E vao no te taetaevao
Te ufa e te oni
Te maiaa e te paè
E vao heeuri no te taetaevao

E ui faahou ā ! E aha te faa ?
E tāriu no te hitapere
Tei faarūpehu i te topatō
Teretereraa no te anuanua
Ùnaùna no te mata

Te ui atu nei ā ! E aha te faa ?
E âfaafaa no te ûupa
E reo ômuhumuhu tei vevovevo
Faaara i te rau manu e
E taata teie

Eie ā te uiraa ! E aha te faa ?
E peho no te taro manaùra
E peho no te ùru māohi
E peho no te àutī
E peho no te uru meià
E peho no te au î

Eiaha e ui faahou…
Mai te vao i te tāriu
Mai te âfaafaa i te peho
Eie mai nei te hupe anuanu,
E vehi haumārū,
I to tāua fārereiraa
Eiaha e ui faahou…

Jacky BRYANT